Mit freundlicher Genehmigung von Rolly Brings/Facebook
Heinrich-Heine-auf-Kölsch-Projekt:
Deutschland - Ein Wintermärchen / Dütschland - E Wintermärche 004
-
[Caput I - et jeiht wigger]
-
Ich kenn die Wies, ich kenn dä Tex,
Ich kenn och die Häre Verfasser,
Ich weiß, se drunke steekum Wing
Un prädichte öffentlich Wasser.
-
E neu Leed, e besser Leed,
Oh Fründe, well ich üch deechte!
Mer welle he op Ääden allt
Et Himmelrich erreechte.
-
Mer welle op Ääden jlöcklich sin,
Un welle nit mih darve;
Verschlemme soll nit dä fuule Buch
Wat fließije Häng erworve.
-
Et wääß henidden Brut jenoch
För alle Minschekinder,
Och Ruse un Myrte, Schönheit un Loss,
Un Zuckerääze nit minder.
-
Jo, Zuckerääze för allemann,
Subaal die Schote baschte!
D'r Himmel üvverlooße mer
Dä Engele un dä Mösche.
-
Un waaße uns Flüjele noh dem Dud,
Su welle mer üch besöke
Do bovven, un mer, mer esse met üch
Die sillichste Taate un Koche.
-
E neu Leed, e besser Leed,
Et klingk wie Fleute un Jeije!
Et Miserere es vörbei,
Die Stervejlocke schweije.
-
Die Jungfrau Europa es verlovv
Mem schöne Freiheitsgenius,
Se lijje beids sich en de Ärm,
Se schwelje em eeschte Kuss.
-
Un fählt dä Paafesään dobei,
Die Ih weed jültich nit minder -
Vivat dä Tuppes! Vivat die Bruck!
Vivat die zokünftije Kinder!
-
E Huhzickskarmen es mi Leed,
Dat bessere, dat neue!
En minger Siel jonn op
Die Stään' vun hühkster Weihe -
-
Bejeisterte Stääne, se lühe wild,
Zerfleeße en Flammebääch -
Ich föhl mich wunderbar erstark,
Ich künnt Eichebäum zerbreche!
-
Zick ich op dütsche Ääd he trodt,
Durchströme mich Zaubersäff -
Dä Riese hät widder de Mamm beröhrt,
Un et wooße im neu die Kräff.