Rolly Brings

Dä Künning hät dat Stöck jään. Dat zeuch
Vun jodem anticke Jeschmack;
Dä ahle amüseete wick mih
Modern Froschjequaak.
-
Dä Künning hät dat Stöck jään. Jedoch,
Wör noch dä Autor am Levve,
Ich reet im nit, sich en Person
Noh Preuße ze bejevve.
-
Dem wirkliche Aristophanes,
Dem jing et schlääch, dem Ärme;
Mer wöödte in baal akkumpaneet allt sinn
Vun Chöre vun Schandarme.
-
Dat Jesocks beköm die Erlaubnis baal
Ze schänge statt ze weedele;
Die Polizei erheelt Befell
Ze fahnde noh dem Edle.
-
Oh Künning! ich mein et jot met dir
Un well ne Rot dir jevve:
Die dude Deechter, verihr se nor,
Doch schon die, die noch levve.
-
Beleidije lebendije Deechter nit,
Se han Flamme un Waffe,
Die forchbarer sin wie Jovis Bletz,
Dä jo dä Poet hät erschaffe.
-
Beleidije die Jödder, die ahle un neue,
Dem janze Olymp si Jeleechter,
Un dä hühkste Jehova bovvendren -
Beleidije nor nit dä Deechter!
-
Die Jödder bestrofe freilich ärch hadd
Dem Minsch sing Messetate,
Et Hölleför es zemlich heiß,
Do muss mer brötsche un brode -
-
Doch Hellije jitt et, die us d'r Jlot
Lossbedde dä Sünder; durch Spende
Aan Kirch un Sielemesse weed
Erworve e huh Verwende.
-
Un am Engk vun dä Dage kütt Christus erav
Un brich die Pooze vun d'r Höll;
Un hält hä och e streng Jereech,
Entschluffe weed mänch ne Jesell.
-
Doch jitt et Hölle, us dere Haff
Unmüjjelich jede Befreiung;
He hilf kei Bedde, ohnmächtich es he
Dem Welterlöser sing Verzeihung.
-
Kenns du die Höll vum Dante nit,
Die schrecklije Terzette?
Wä do vum Deechter enjesperrt,
dä kann keine Jott mih rette -
-
Keine Jott, keine Heiland erlös in je
Us dem Jesang us Flamme!
Nemm dich en Aach, dat mer dich nit
Zo su ner Höll verdamme.
-
(C) Op Kölsch vun Rolly Brings